عفوا سيادة الرئيس المخلوع، طلعت بتفهم و إحنا أغبياء!
عفوا سيادة الرئيس المخلوع، طلعنا مش مؤهلين لأي حاجة!
عفوا سيادة الرئيس المخلوع، إحنا مش شعب مصر...إحنا عندنا أجندات!
عفوا سيادة الرئيس المخلوع، إحنا ما نستاهلش نبقى أحرار!
وبدأنا نقول كده خلاص يا ريس، إحنا آسفين يا ريس، بس إحنا مش آسفين إننا خلعناك، إحنا آسفين لأننا ما عملناش الواجب بتاعنا صح الأول!
آسفين إننا سبنا السوس ياكل فينا سنين طويلة، إحنا وأهلنا وشعبنا، سبناه ياكل في بلادنا!
آسفين إننا صدقنا إن العالم كله بيتكلم علينا وعلى ثورتنا وعلى أخلاقنا وعلى وحدتنا ومصريتنا، وإحنا كل ده ما كناش شايفين إننا طبقة رقيقة قوي من فوق، وإن العمق متآكل ومتخرّب وناخر فيه السوس!
آسفين إننا كنا فاكرين نفسنا مؤمنين بجد -مسلمين وأقباط- وان الإيمان ده موجود في قلوبنا، زمش محتاجين نقوله للناس ولا نظهره في شكلنا ولبسنا، ومظاهرتنا كل يوم، وإننا نحارب بعض ونقتل بعض عشان نعرف مين مسلم ومين قبطي!
آسفين على شكلنا أيام الثورة اللي كان باين عليه إننا بنؤمن بالحرية وبنحاربك عشان كنا فاكرين إنك ظلمتنا وأخدت حريتنا مننا من 30 سنة، وكنا فاكرين إننا هنستردها أول ما نخلعك، بس دلوقتي لقينا نفسنا أعنف ديكتاتوريين على الأرض، وماحدش قابل حد، ولا طايق حد، ولا دين حد، لا قبطي ولا مسلم.
آسفين عشان كنا فاكرين نفسنا متحضرين وواعين ومثقفين، لما شفنا نفسنا بنتكلم في السياسة والنظام أيام الثورة، لكن لقينا نفسنا مغروزين في وحل الجهل والتخلف والتطرف وخيبة الأمل!
آسفين عشان افتكرنا إننا بنفكر وبنفهم و نحلل ونقدر حجم المأساة و المشكلة اللي بلادنا فيها، لكن لقينا نفسنا ماشيين زي القطيع ورا بعض، وما حدش افتكر إن عنده مخ يفكر بيه، وإنه مش محتاج يركب جزمة حد فوق بدل مخه!
آسفين إننا افتكرنا لما رفعنا علم مصر في التحرير، إننا بجد بنحب مصر، بس لقينا كل واحد فينا مش بيحب حتى نفسه!!
إنت نجحت في حاجة واحدة يا ريس...إنك تعرفنا إننا ما كناش فاهمين إحنا محتاجين إيه، قبل ما نفكر إننا محتاجين ديمقراطية!!!
ليست هناك تعليقات:
إرسال تعليق