هنقول فينك يا أمن الدولة امتى؟!

منذ فترة وأنا أتابع أحداث الفتن الطائفية التي تتوغل كالسرطان في جسد الشعب المصري بكل حسرة وضيق ورعب وحزن وغضب، غضب منا أولاً قبل أن يكون ممن يسعون بكل قوة لتخريب هذه الأمة وتشتيت أهلها وإثارة الفتن بين عنصري الأمة، نعم غضب منا نحنا، غضب من كل من يقرأ الأحداث جيداً، من كل مَن يمسك منا بقلم ويكتب عن الثورة والفساد الذي غرقنا فيه منذ أكثر من نصف قرن، ونحتفل سوياً الآن في قالب من الثلج لا يذوب ولا يشعر بمن حوله!

وإذ بنا نخرج من القالب الثلجي ونفيق من غفوتنا على أشرس الأحداث وأكثر الأعداء شرا، الذين نموا وترعرعوا في أرض النظام الخصبة، هم أعداء الوطن الحقيقيون، أعداء الشعب المصري.

ما هذا الذي يحدث حولنا الآن، بل ما هذا الذي يحدث بنا؟! وقد أصبحنا فريسة لكل من يدّعي الدين ويدّعي الإسلام، والإسلام -بل وكل الأديان- بريئة منه.

من امتى وإحنا في مصر بنسأل عن دين المحافظ والوزير والناظر يا شعب مصر؟! من امتى؟ من امتى بتسأل حد إنت منين؟ لو من قنا يبقى إنت أكيد قبطي! يعني إيه؟ إيه اللي بيحصل ده؟ ما إحنا كان عندنا وزير مالية قبطي لأكثر من خمس سنوات، أهم وزير في الوزارة قبطي!

حد فيكم أخد باله مسلم ولا قبطي ولا كافر حتى؟ مين أخد باله إن محافظ قنا القديم كان برضه قبطي؟ ومين اللي واخد باله من محافظي مصر كلهم..مين فيهم القبطي ومن المسلم؟ ومين واخد باله الوزير ده ملته إيه؟ ومين تفرق معاه؟ ما هو حسني مبارك مسلم يا مسلمين، عمل لنا إيه؟؟ وبطرس غالي قبطي عمل فينا إيه؟ نسيتوا؟

وبعد ما طلع الأقباط من قنا وقالوا إحنا كمان مش عايزين قبطي، عشان مش هيعرف يجيب لنا حقنا، مين من مصلحته يطلع ويقلبها طائفية، وتبقى المشكلة إنه قبطي؟ مين؟ ولو عارفين مين، ساكتين ليه؟ فين الحكومة والوزارة؟ سايبين ليه مايكروفون مع كل جاهل و عميل وخائن.. وعشان نوصل لإيه؟

إحنا فين من اللي بيحصل؟ ليه سايبين المعركة للناس دي؟ ليه ساكتين وبنتفرج عليهم وهم بيلعبوا في دماغ ناس جاهلة غلابة؟ وهنتحرك امتى؟مستنين لما يجي علينا يوم نقول فينك يا أمن الدولة ولا إيه يا مصريين؟!!!