ولا يهمك يا حكومة...

أنا مش فاهمة كل الناس مخنوقة من الحكومة وبتلعن سنسفيل أبوها ليه؟ مالها الحكومة يعني؟

إيه المشكلة لما يكون نصف الشعب المصري مش لاقي ياكل؟ ما عنّه ما كل يا أخي!

وإيه المشكلة لما يكون إجمالي الديون مش عارفة كام مليار، طب ما تتبرعوا بدل ما بتشتكوا عمّال علي بطال! بلاش تصييف يا سيدي السنة دى واتبرع لأمك الحكومة.

وإيه المشكلة، لما يكون 40% من الشعب المصري تحت خط الفقر، ومين اللي قال لهم يعني يروحوا تحت الخط ويقعدوا؟! ثم إن ما حدش بيموت من الجوع في مصر، وحتى لو ماتوا، إحنا كتير قوي، خلي البلد تخف شوية!

وإيه المشكلة لما يكون فيه مش عارفة كام مليار جنيه مسروقين من دم الغلابة ومتهربين برّه البلد؟ مش أحسن ما كانوا شربوا بيهم حشيش، ولا ولادهم فسدوا من كتر الفلوس؟!

وإيه المشكلة لما وزارة المالية تفرض ضريبة مبيعات، وضريبة دخل، وضريبة عقارات، وضريبة ترفيه على أي حاجة ملهاش دعوة بالترفيه، وتضرب على فلوس المعاشات، وتضارب بيهم في البورصة وتخسرهم؟ مش أحسن ما كان الشعب الأهوج ده راح سكر بيهم؟!

وإيه يعني لما الدولار كان بيساوي 25 قرش أيام عبد الناصر، ودلوقتي بقى بأكتر من خمسة جنيه؟ مش بقى عندكم مروحة وتكييف وتلاجة ودفي دي وإم بي ثري يا ظلمة!!

وإيه يعني لما يكون فيه أزمة بوتاجاز وسكر وزيت وعيش ودقيق وقمح وطماطم، خلاص يعني هتموتوا من قلة الطماطم يا غجر؟!

وإيه يعني لما تبقى الفاكهة والخضار قال إيه مسرطنة، مش فيه علاج على نفقة الدولة وتأمين صحي عالي المستوى ولا هو افترا على الخلق؟!

وناس تقول مش عارفة الوزير ده بياخد كام في الشهر، و رجل الأعمال ده بيصيف هو وعياله في سويسرا، والمسئول الفلاني بيعالج مراته في أوروبا ببلاش، والتاني مشغل ابنه في شركة بترول وهو حمار حصاوي أصلاً، يا إخوانا بلاش حقد طبقي بقى!

ولا العنوسة ولا المخدرات ولا أطفال الشوارع ولا حوادث الطرق، ولا الرشاوى والمحسوبية والفساد الحكومي، ومشروع توشكا قال إيه الفاشل، وأراضي الدولة اللي بتتباع مجاملات ومشاكل المواصلات والسكة الحديد والتعليم الزبالة والبطالة وبلطجة الشرطة والتعذيب في الأقسام وقانون الطوارئ وقلة الأخلاق وقلة الدم، خلّوا عندكم دم بقى واذكروا محاسن موتاكم!

الحكومة زي الفل بس الشعب –ابن التييييييييييت- هو اللي مش عارف يتحكم عدل!
 

ولا يهمك يا حكومة...