ملحوظة مهمة: الكلام ده من محض خيال المؤلف وليس له أي علاقة بالواقع، وأي تشابه مع الحياة اليومية صدفة بحتة أقسم بالله ؛)
- الجواز مش حب ولا صوصوة، ولا هو حاجة معينة ليها وصف وأول من آخر، هي مجرد حالة اجتماعية ملهاش تصنيف غير إن أجيال ورا أجيال بيتكعبلوا في نفس الحفرة، بوعي وإرادة كاملة، وفي أحيان بدون ندم، ليه؟ ما أعرفش!
- الراجل اللي فاكر إنه بيتجوز واحدة عجبته على حالها كده عشان يغيرها فتبقى مناسبة أكتر ليه، ده راجل حمار براس بني آدم، لو ليها شخصية مش هتتغير، ولو ملهاش شخصية هتتغير وهتبقي مسخ مش مناسب ليك خالص يا أذكى إخواتك.
- الست اللي بتتجوز راجل عشان تخنقه وتقول له إنت رايح فين وسايبني ليه، فسّحني، خرّجني، هاتلي، دي بتخلق راجل كداب لأنه هيتفنن في اختراع القصص عشان يخلص من الزن، اعقلي كده يا ماما وسيبك منه، هيرجع مش رايح في حتة ما تخافيش، اللي خدته القرعة تاخده أم الشعور.
- يا جماعة مفيش حاجة اسمها ست نكدية وراجل نكدي، بصرف النظر إن نسبة الرجالة النكدية أكبر (همّا أصلا بؤساء بالفطرة!) بس برضه دي مش قاعدة، لأن الرجالة لما بتقعد مع بعض لوحدهم بيضحكوا، والستات لما بتقعد مع بعض لوحدهم بتبقى قعدة مسخرة والله، يبقي العيب في الميكس! دونت ميكس بقى.
- سيب مساحة وسيبي مساحة، بلاش خنقة وتلزيق الله يبارك لك منك ليها، سيبها تنزل مع أصحابها هتيجي أحلى ومنوّرة، سيبيه يفك عن نفسه مع أصحابه، هيجي فرفوش ونعنوش، مش لازم نفضل ٢٤ ساعة مع بعض مفيش حاجة ممكن تفرقنا أبدا يا عمري، ابعد حبة تزيد محبة
- لو الست والراجل بيشتغلوا، يبقي مفيش حاجة اسمها شغلته وشغلتها، هو ده بيت مشترك عملتوه مع بعض، عشان تعيشوا فيها بأحسن وضع ممكن، مش بالضرورة لازم هي اللي تطبخ وتنضف وتاخد بالها من طلبات البيت وتروح السوبر ماركت وتفتكر إيه الي ناقص في التلاجة وتراعي الولاد وتودّي التمرين وتذاكر وتربّي. فين المتعة اللي في حياتك بقى؟ المشاركة هتخليك عايش، حاسس إن ليك بصمة ولازمة لا مواخذة، مش داخل تتعلف وخارج، ومشاركتك في شرا العلف مش مجهود كفاية للأسف.
- خلينا نتفق إن لا ذوق الراجل في الشوبنج بيعجب الست ولا بطء الست في قرار الشرا بيستحمله الراجل، يبقى الأحسن كل واحد يخليه في حاله، خدي صاحبتك معاكي أفيد لك وخليك إنت مع صاحبك على القهوة أرحم لنا
- لازم يا رجالة تفهموا إن الستات مش بتسأل الراجل عايز تاكل إيه النهارده! والله ما بيحصل، ارحم نفسك من وهم إنك مخنوق من السؤال ده وموافق تاكل أي حاجة بس تترحم من إرهاق التفكير العميق في الإجابة، أقسم بالله ما عايزين نطبخ أساسا، فبلاش فرط الإحساس بالأهمية الله يكرمك.
- بص يا حبيبي، وبصي يا ست الكل، اللي ناوي فيكم يعمل حاجة زيادة وطالعة منه، يعملها وهو ساكت، مش عشان جبتي حاجة في البيت تعملي فرح، ومش عشان غسلت الحوض ولا رحت معاها مشوار، تغنّي عليه سبع سنين، اللي عايز يعمل حاجة يعملها بحب، أو الأحسن إنك ما تعملش من أصله.
- لما يا حبيبي تاخد قرار غلط، قول عادي مفيش مشكلة، إنت مش بورم يعني، مش لازم تكمل القصة للآخر عشان تثبت لنا أي حاجة، وإنتي يا عسل اقعدي ساكتة في اللحظة دي عشان لو كبرت منك الدنيا هتولع، الجلالة بتبقى وخداهم في اللحظة دي قوي!
ليست هناك تعليقات:
إرسال تعليق